為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 07 月 15 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

搞大卡士

舞台劇嘅吸引力,在於訴說故事嘅同時,亦能同觀眾產生互動,代表更加考驗演員嘅演技同功力。嚟緊喺九月公演嘅舞台劇《搞大電影》(Speed the Plow),除咗故事系出名門,仲集合咗影帝黃秋生,同「是但噏」強人林海峰(Jan),不論演技定係名氣,都係近期首屈一指嘅陣容。加上兩位資深嘅舞台劇女將:今次嘅導演甄詠蓓(Olivia)同韋羅莎(Rosa),只係講卡士,已經搞得好大!

今次「Paco巨星飯堂」就邀請四位嘉賓,去到位於灣仔嘅「滿福樓」,品嘗特色嘅中菜同時令嘅蟹料理,細說佢哋嘅「搞大」事件簿。

台前幕後集阿Jan、秋生、Rosa同Olivia嘅舞台劇《搞大電影》,不論係舞台劇迷定係佢哋嘅粉絲,都熱切期待9月正式公演嘅日子來臨。

 

志在學嘢

唔少人睇到秋生同阿Jan呢一個陣容,就已經相當驚喜,仲會以為係後者首度投身舞台劇界,跟同屬名牌嘅秋生鬥戲。但一向「是但噏」嘅阿Jan表示:「三年前我做第一個舞台劇(《笑の大學》)嘅時候,係想知以我嘅年資,係咪仲有機會去學習呢?所以上次我係主動要求演出嘅,今次都係,而且見到可以同秋生、Olivia同Rosa學嘢,仲唔使交學費,又有演出費收,簡直離晒大譜啦!」

二人合作嘅契機,係一六年阿Jan邀請秋生,為《是但噏廣東話》拍攝短片嘅時候。「我同秋生講:『第日如果有咩好嘢,記得預埋我。』,當時我提出嘅條件好優厚,就係我好得閒,而且演出嘅酬金可以好平,但都要等咁耐,先等到佢真係有個咁筍嘅嘢益我。」

秋生就話:「佢當日話想合作,我就一直記錄在案,因為做舞台劇,都要各方面嘅配合,好似劇本、時間。我哋今次俾阿Jan嘅係良心價,你知啦,舞台劇負擔唔起明星嘅市場價,但俾得佢嘅,已經係我哋能力上俾到最好嘅價錢。(阿Jan:「我哋唔係講呢啲嘅!」)

「我見到有啲劇團,會俾高價啲明星,然後剋扣基層,咁樣就無意義嘅,今次我就覺得,各方面嘅條件都好啱,於是我哋就合作嘞!」

我帶四位嘉賓去到位於灣仔萬麗海景酒店嘅滿福樓,一邊品嘗特色中菜同時令嘅蟹料理,一邊暢談佢哋嘅舞台劇大業。

 

即將喺九月公演嘅《搞大電影》,故事關於電影製作,令飾演好兄弟嘅秋生同阿Jan,面臨決裂危機。

 

原作劇本由荷李活著名劇作家David Mamet撰寫,其作品以抵死幽默及反映人性見稱。

 

青胡椒焗蟹($900),融入了中國及地道東南亞菜式嘅精髓,來自泰國嘅青胡椒,係廣東菜式中絕少採用嘅配料,極具特色。

 

金絲脆腰果($90),金絲指炸至金黃鬆脆嘅芋絲,配上白醋混合蜜糖嘅醬汁,提升芋絲的香甜。

 

蜜汁烤叉燒($260)屬餐廳嘅經典名菜,選用優質梅頭肉,配以生抽及麥芽糖製成,鮮嫩多汁、鹹甜適中,每一口都讓人回味無窮。

 

高手過招

能夠集合兩大實力派喺舞台上合作,劇本嘅挑選好重要,重任就由導演Olivia領軍承擔。「當我聽到大師兄(秋生)話阿Jan會一齊演,我覺得要搵一個啱佢哋,又俾佢哋發揮到嘅劇本。我哋揀咗好多個劇本,喺決定用o依家呢個劇本之前,都俾過另一個劇本阿Jan,但係我哋好快就否決咗嗰個劇本。

「後來睇咗《Speed the Plow》嘅劇本之後,我哋都覺得好適合去演,因為故事表面上係講電影製作,實質包含男人嘅友情、人性。而決定演呢個劇之後,我哋成個團隊都有份將原作劇本本地化,令觀眾睇嘅時候有共鳴。」

唯一嘅女角Rosa,係秋生同Olivia嘅演藝學院師妹,Olivia話:「我見到呢個女主角嘅人物設定,第一時間就諗起Rosa,因為佢嘅舞台經驗豐富,演技亦都好好,可以駕馭到角色,亦都可以同大師兄、阿Jan擦出火花。」

Rosa表示:「我嘅角色好神秘,係大師兄嘅秘書,表面睇好似冇乜嘢,但實際上佢係導致兩個男主角決裂嘅關鍵。」

廿年前秋生同阿Jan喺電影《誤人子弟》嘅表現,至今仍然令人回味,佢哋嘅再度合作,已成一大焦點。

 

原作曾經屢次公演,擔演過嘅演員有麥當娜(Madonna)、影帝奇雲史柏西(Kevin Spacey)同謝夫高保林(Jeff Goldblum)。

 

 

 

香炸登爵尼斯蟹配白酒汁($900)係中西合璧概念菜,將中式烹調嘅蟹完美配搭意式白酒汁,令味蕾嘅新鮮感即時提升。

 

海鮮湯花蛤煮蟹($900),鮮甜濃郁嘅海鮮湯,有包括蝦、花蛤等上乘海鮮食材。登爵尼斯蟹充份吸收濃湯嘅豐富精華,令蟹肉嘅鮮味提升到更高層次。

 

魚湯手打魚腐浸時蔬($198),手打魚腐及白菜,配上熬製嘅魚湯中,味道清香。

 

演得瀟灑

劇中阿Jan飾演懷才不遇嘅電影編劇,秋生就係電影界嘅著名監製,二人份屬好兄弟,但因為一個電影劇本,仲有Rosa呢個神秘秘書,好兄弟面臨決裂危機。秋生表示:「David Mamet(原作編劇)嘅劇本,角色嘅對白語言力量好強,講男人之間嘅鬥爭、情義都好獨到,我好鍾意。」

劇本亦關於電影製作,相信秋生同阿Jan都唔會陌生,我都係一個電影製作人,都明白製作一部電影,唔係一件簡單嘅事,秋生就豪氣咁話:「血腥!暴力!加一大班女仔、少少性感!得呀!(Olivia:「係大師兄嘅對白嚟嘅。」)

「再唔係就劉德華、梁朝偉、周潤發!得呀!」

哈哈哈!秋生即時「上身」,絕不負影帝之名!我先預祝《搞大電影》break a leg!

Olivia同Rosa曾經多次喺舞台上合作,前者盛讚後者嘅演技出色,所以今次喺揀女主角之時,就立即諗起老拍檔。

 

三位演員同導演Olivia、製作團隊,於上周正式投入綵排,劇本經過本地化後,更能令觀眾產生共鳴。

 

荷塘玉帶蒸豆花($290),豆花加上豆漿、蛋白及腐皮一起蒸過後,散發濃郁的豆香,口感滑溜。

 

涼拌鮑魚($140/隻)選用南非鮑魚,先蒸熟,再先後加入燒汁、梅子汁及生蒜等醬汁,酸酸甜甜令人倍感清新開胃。

 

滿福樓
地址:灣仔港灣道1號萬麗海景酒店3樓
電話:28028888 / 25846971