為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 親子天地  > 系出名門 2012 年 01 月 07 日

朱凱婷搵表妹做無間道

兩個多月前,朱凱婷挺着七個月的大肚,細說未來育嬰之路。如今,女兒Sheryl(林穎彤)已經來到現實世界,每隔三至四小時伏在她的懷中充飢,如此親密又奇妙的感覺,她說,只有為人母親的才能真切體會。

剛剛榮升人母的朱凱婷,早前在家中與丈夫、女兒同度溫馨又平靜的平安夜。

為了貼身了解女兒的成長過程,朱凱婷除了事事關心外,也密謀找表妹擔任女兒的傾訴對象,在適當時候助表姨甥女解決問題,「有啲小朋友唔係咁想乜都同父母講,咁我咪叫表妹同囡囡搞好啲關係,獲得佢嘅信任先,然後一知道佢發生乜事就可以暗中話畀我知嘛!」連教女也要玩「無間道」,做母親的果然費盡心神。

朱凱婷於上月十三日剖腹誕下六磅十二安士的女兒,丈夫Dickens全程陪伴在側,並親自為女兒剪臍帶。

嫌老公緊張

○一年港姐季軍朱凱婷,於一○年與拍拖五年的飛機師男友Dickens結婚,並於上月十三日剖腹誕下六磅十二安士的女兒Sheryl。回想女兒出生的那刻,朱凱婷和丈夫均感動難忘,她說:「難忘在於個手術過程好快,我打完麻醉針之後,就感覺到醫生喺我個肚度開緊刀,跟住好快就聽到囡囡呱咗一聲,然後就見到醫生將佢抱到嚟我面前;我望吓佢啲手手腳腳,見到佢個面珠有兩嚿肉仔,就已經開心到喊咗出嚟喇!」

至於飽讀育嬰書做足準備的丈夫Dickens,既幫忙剪臍帶,也有幫忙湊女換片,更錫到囡囡燶,「有次佢換片嗰陣,BB『斟茶』畀佢飲喎,搞到整濕咗件底衫仔,跟住佢就衝過嚟摷過件底衫同BB換啦,點知啲厚底衫啱啱洗晒,得番啲薄嘅。然後BB又打咗兩個乞嗤,佢即刻好自責話自己搞到囡囡冷親!之前屋企人唔想BB嘈住我瞓,將佢放喺隔籬書房,老公都係寧願過隔籬陪住BB瞓,佢真係超級緊張o架,我咪叫佢放鬆啲囉!」

女兒的英文名Sheryl,是由朱凱婷的英文名Heidi與丈夫Dickens拼湊而成,代表是兩人的結晶品。

Sheryl最愛洗澡,每次浸在水中便會輕托頭仔狀甚舒服,應該是遺傳了朱凱婷愛乾淨的性格。

親戚做探子

朱凱婷表示,灌輸正確教育給女兒是非常重要的,也希望自己做個開通媽咪,「我希望成日同佢傾偈,成為佢其中一個可以分享心事嘅好朋友,跟住暗地裏睇住有冇嘢要出手提點佢。」由於朱凱婷是家中獨女,自小與姑姐、姨姨感情深厚,每有少女心事也會找她們傾訴,因此,她也希望女兒可以跟親戚們多些溝通,「我已經同咗表妹講,要攞我囡囡嘅信任,第日囡囡同佢講秘密,佢就要暗中同我講番,因為我覺得小朋友未必敢同父母講晒所有嘢!」

朱凱婷形容女兒現時「喊得有道理」,不會隨便扭計扭抱,加上她在母親的家中坐月,有家人和陪月姐姐照顧,感覺輕鬆又放心,「我主要負責食、瞓、養好身體同埋提供人奶!其實我初頭都有啲抗拒埋身餵奶,聽講餵得多,個shape又唔靚呀,但見到佢喺我心口度啜住,個樣好似好舒服咁,我就覺得好冧!諗真,其實只有我先可以畀到佢一個咁親密嘅關係,呢樣嘢真係無價o架,身形嗰啲遲啲先算喇!」甚麼都可以置諸不理,唯獨愛情的結晶品不容忽視。

朱凱婷懷孕時,與任職飛機師的丈夫拍攝了一輯大肚寫真,四手捧着大肚,洋溢幸福。

朱凱婷形容女兒現時「喊得有道理」,不會隨便扭計,加上有家人及陪月姐姐照顧,坐月坐得頗輕鬆。