為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2011 年 04 月 16 日

無腦憤青癱瘓超市 民主黨前常委闖禍

一班憤青早前搞咗個「反地產霸權」活動,在紅磡一間百佳超市玩嘢,用大堆神沙畀錢,搞到收銀處癱瘓,顧客要排長龍,罵聲四起,最後驚動警員到場,仲畀班友指住鼻哥鬧。佢哋以為好得意,自拍一段video放上youtube,誰知惹起公憤,網上討論區「媽」多過讚,連社民連都指班友無腦。

呢次行動嘅搞手,係曾任民主黨中常委兼九龍西支部主席嘅林子健,不過搞出個大頭佛後,民主黨內多數意見認為佢亂玩嘢,損害黨嘅聲譽,提出召開紀律聆訊,討論係咪踢佢出黨。林子健見勢色唔對,竟然夠膽做冇膽認,迴避傳媒詢問。

民主黨周日發動「反預算大遊行」,只有小貓三幾百參加,場面慘淡。

線人話,林子健過往在黨內幫不同大佬做二五仔收風,單仲偕做咗副主席後,撥咗一筆錢畀佢搞網上電台,不料佢用個網召集憤青亂搞行動,結果闖出禍。

民主黨近排都算當黑,周日有份發動嘅「反預算大遊行」,只得小貓三數百,比原初預計嘅一萬五千人差得太遠。線人話,民主黨反對政府派六千元大失民心,自此民意插水,但個頭已洗濕,只好硬頂落去。據中大最新調查,民主黨支持度比二月跌三個百分點,被民建聯追上,極之慘情。

憤青玩嘢癱瘓超市,搞到神憎鬼厭,搞手之一林子健(小圖)見勢色唔對,避不回應。