*

為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
文章 | 圖片 :
主頁 > 時事 > 政官莊 > 小女神 小辣椒 出位受熱捧 愈激愈紅
小女神 小辣椒 出位受熱捧 愈激愈紅

今時今日,政圈同娛樂圈一樣,實力派新聞日少,反而o靚模敢出位,個個禮拜上封面,勁過超級巨星。概括一句:愈激愈紅。

好似「民主小女神」周澄咁,早排夾埋幾條o靚組成「大專2012」參加五區補選,靠激進口號取得萬幾張票,除了被網上宅男奉為新偶像,更迅速成為傳媒新寵,連香港老牌文化潮流月刊《號外》,都搵佢做封面人物,當正佢係明星着晒時裝擺甫士在studio影咗一輯相,與周秀娜、Angelababy爭一日之長短。

周澄着最新時裝成為老牌文化潮流月刊《號外》封面人物,而嚴敏華就登上報紙內版頭條(小圖)。

這本刊物由陳冠忠等在七十年代創辦,過去講思潮時尚少談政治,記憶所及搵激進分子做封面都係首次。篇訪問標題是「左女小傳」,周澄講到明自己「左」,跟隨長毛信咗托派思想,認為托洛斯基主義才能解決香港的深層矛盾,簡而言之,就是打倒資本主義實行真正社會主義。想當年長毛的「革馬盟」就是托派組織,主張大搞革命,推翻舊制度。

周澄仲話二○一二年選舉時要把民主黨班老嘢拉落台,推新人上位取而代之,擺明要革「民主老將」的命,仁哥卿姐out嘞,唔該借歪!據聞社民連想斟佢入夥,但佢唔想被組織縛束,亦認為政黨多數投機,所以拒絕唔受溝。

到百間中學演講 毓民廣收「紅衛兵」

社民連少收周澄一個冇所謂,現時想入夥的激青排晒長龍,收到手軟。線人話,五區公投的社民連義工約三千人,七成幾是十八至廿二歲的青少年,可見「紅衛兵」兵源充足。

其中一位小妹妹最近就相當出位,佢叫嚴敏華,今年讀中六,早前在「城市論壇」追罵一名不支持六四平反的青年,話「聽日共產黨殺你全家」,被差人拘捕控以恐嚇罪,一炮而紅。上周某報章就同佢做咗內版頭條大半版訪問,儼然政治新星。佢講明自己立志從政,仲話打算去台灣修讀政治,跟民進黨學習政治抗爭。

線人指,嚴妹妹一戰成名後,被封了個外號「小辣椒」。佢在facebook內表露出強烈的烈士情結,想做轟轟烈烈大事,其中一句咁講:「正熱切期待中共派軍鎮壓在香港爭取民主的人,讓我們可以成為其中一個烈士!」線人話,社民連內有這種想法的「紅衛兵」不在少數,他們不甘平凡,想做英雄,為此乜都敢做,如果唔勒住,分分鐘爆出大鑊嘢,政府千祈唔好輕視。

政圈老友指,激進思潮正在中學及大專迅速發酵蔓延,社民連食住個勢,正在校園加強影響力,過去一年毓民就先後去過逾一百間中學演講,以佢老哥嘅口才同魅力,班細路愈聽愈high入晒腦,煲呔同鬍鬚曾只去一兩間學校,點夠佢哋揮吖!

社民連旗下有超過二千「紅衛兵」,周日狙擊煲呔的激青,就是來自這支部隊。

六.二三圍攻立會 激青又開抗爭派對

激青周日玩完班高官,跟住仲有兩場抗爭派對等着開,先是六月十七日「余曾辯」,社民連已講到明當日班馬去政府總部踩場,在外面打鑼打鼓唱衰政改。

有消息指煲呔堅持要在政府總部舉行,因為有一條地下秘道,如果被圍可以行秘道遁回禮賓府。呢條料完全戇居,原來這條多年前建造的通道,早已封咗,根本行唔到人,煲呔就算被困,都冇可能走此秘道甩身。

另一場P是六月二十三日在立法會外舉行。社民連已開始聯絡反高鐵聯盟、大專2012、大專撐公投聯盟、網上電台FM101等,部署當日發動幾千友圍攻立法會,企圖重演反高鐵一幕,向議事堂內泛民議員施加壓力,阻止他們轉軚。線人話,參加人數可能冇反高鐵咁多,但亦來勢洶洶,政改方案過唔到就冇事,如果過到,分分鐘搞出大件事,連社民連自己都有小小擔心。

到今日為止,政府高層對通過方案仍然打輸數,雖然中央周一進一步講明二○一七年及二○年的雙普選是真普選,但泛民議員為了選票唔敢冒風險,好大可能再投反對票。

示威者周日衝擊曾班子,當天部分人獲傳媒採訪車接載。佢哋六.二三又再玩過。

報社採訪車 載示威者追擊煲呔

禮拜日憤青四出狙擊曾班子,班友點惡法,市民都在電視畫面睇到,但有啲現象,大家未必知道。

有在場人士指出,煲呔與唐唐等每到一地點,必有大批記者圍埋嚟影相,呢樣嘢唔奇,奇就奇在,記者之中有人揸住部相機撞吓撞,仆前退後,似有心搞亂檔,細看之下,呢啲人唔似係記者,顯然係扮攝記走到最前玩煲呔。

另外,上次煲呔由金鐘出發去九龍再去沙田,在場人士發現《蘋果》的採訪車載住示威者第一時間抵達現場,火速做嘢截擊煲呔。睇嚟傳媒不單止向示威者通水,更提供埋運兵車,幫手打游擊。

至於煲呔嗰邊,今次就調整策略,當憤青圍攻煲呔、唐唐、鬍鬚曾三巨頭之時,其他局長同副局長就化整為零,分頭自行「閃」出街向市民派傳單,由於冇憤青滋擾,行動十分順利,好多市民都過嚟攞傳單,仲表示支持。傳媒當然冇報道呢啲場面,公眾未必知。

面對激青如狼似虎,煲呔冇膽怯,同班友鬥大聲。

分類︰ 政官莊
2014年o靚模寫真大晒冷
全城最強 猛鬼放題
《等人個人咖啡》優先場戲票60張《閨密》換票證60張《銀河守護隊》T恤及記事簿各10份博士倫眼舒潤®強效保濕潤眼液Artelac® Advanced兩盒