*

為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
文章 | 圖片 :
主頁 > 娛樂圈 > 留星語 > 天地有正氣 馬浚偉
天地有正氣 馬浚偉

容我單刀直入,從娛樂新聞角度來看,馬浚偉其實是幾悶的:他沒有攀龍附鳳登入豪門;沒有甚麼艷女黐埋身,又沒有牀照離奇流出;外貌呢,十年如一日,鼻子沒變高或變長,繼續單眼皮;爭獎項,他往往恍如置身事外;論緋聞,多年來都是曇花一現,又成不了師奶街坊茶餘飯後的話題。

然而,有趣的是,你不會抗拒看他在《紫禁驚雷》演聶多寶,亦不會因為他在《大廚出馬》中示範炒飯而轉台。

我弄不清楚這是否可稱為「觀眾緣」,只是每次看到馬仔在螢幕上,腦海便會自動彈出「默默耕耘」這四個字,再粗鄙啲或直接啲講,即是做牛做馬、死做爛做。

「事實上,我只係一個想靜靜地做嘢嘅人,其他嘢我真係唔想諗咁多,亦唔想煩!」他說。「做牛做馬?死做爛做?哈哈哈哈!其實我亦都有我嘅理想,我唔係唔知咩嘢係shot cut,唔知乜嘢叫做奸詐,但我過唔到自己,做唔出!我唔覺得我依家咁樣朝住呢個方向去行,唔會得唔到我想要嘅嘢,只係時間會比較耐啲啫。因為我嘅生存之道,始終堅信人最後都係要行正道!」

忽然間,我看到眼前的馬仔身後,發出了很耀眼的光芒——

那是從落地玻璃窗透進來的雨後陽光。

親生仔

還很記得王喜曾經說過,無綫力捧人的手法是「水銀遍地」,我所領會到的意思是,只要你是TVB聽聽話話的親生仔,就會獲得公司力捧,繼而在任何大小節目活動都會看到你的嘜頭。馬浚偉查實一直以來也沒有停過在螢幕上出現,然而卻總是沒有這種「無孔不入」的程度,難免令人覺得,他並非TVB的親生仔。

「呢樣嘢,有好多人都同我講過,覺得我可能係TVB執番嚟或者係領養,哈哈哈!冇所謂啦!其實我由○四年起,公司已經係我經理人,如果再計落,我九三年出道唱歌時,已經同公司簽咗歌星合約,即係話,到依家我已經簽咗TVB十八年,真心講,我好愛呢個機構!我由清水灣電視城到依家將軍澳電視城,已經歷過幾個朝代:趙崇文、陳灌明、何定鈞……睇住我喺無綫大嗰啲,都退咗休囉!」

《紫禁驚雷》中的聶多寶,馬仔形容,這個角色本質很好,但後來無奈要壞起來。

之前不是有報道說過,資深傳媒人徐蓉蓉當了他十年經理人,最近才被他激到辭職嗎?「我本身有間出版社,徐姐一直都係我出版社裏面嘅Manager,幫我睇出版睇書,佢有時接到啲job,都會彈番畀我TVB經理人,衰啲講,徐姐只係喺我公司做嘢,不過我亦會freehand畀佢做其他freelance。」

OK,經理人的問題搞清楚了,不過,何解他多年來彷彿在TVB只是死做爛做,沒有像其他親生仔一樣,受到公司甚麼優越的待遇呢?

馬仔說,這是一個雙向的問題。

主持《大廚出馬》大騷廚藝,冧盡好多師奶觀眾。

製作部

他分析,關鍵之一,可能是他很少踏足TVB主宰藝人工作量多與少的八樓management部門。「咁多年嚟,我去過幾多次八樓都數得出,我去到冇辦法投入,有啲同事嘅名我都噏唔出!可能係因為我唔好,唔識得同佢哋溝通啦,久而久之,啲人咪會覺得我好似同無綫好疏離咁,又或者我對佢哋好似好陌生咁囉。但我作為一個藝人,我覺得management都會幫我安排好我嘅嘢,唔需要我刻意做任何嘢o架啦!

「反而我同無綫最有感情嘅部門,其實係七樓戲劇製作部,亦可以話,我一直以嚟係製作部湊大,我同導演、監製、編劇、PA、crew、武術組個個都好有感情!我喺TVB咁多年嚟,唯獨一路冇變嘅,就係珍姐曾勵珍呢個製作部,我由歌手轉去拍劇做演員、拍《鹿鼎記》,就係珍姐同添哥李添勝叫我,○四年我同公司簽management合約嘅,都係珍姐。我入行,珍姐喺度,到依家,珍姐仲依然喺度!」

至於跟樂易玲和陳志雲這兩位TVB高層交情又如何?「前年我拍緊《蒲松齡》時候,我其實已經約滿,樂小姐有搵我傾,不過好多諗法,大家未磨合到;後來陳生同珍姐又再搵我傾一次,嗰次我先正式第一次見陳生,佢自己都覺得好好笑,大家咁多年喺同一間公司咁耐,都好似唔識咁!嗰次續約其實都好多謝佢哋,因為佢哋畀咗好多承諾我,都一一履行到出嚟,特別係陳生,佢個人好實事求是!」

《正識第一》加深了馬仔的主持形象。

在新劇《當旺爸爸》中,馬仔飾演一名只顧揾錢的小市民。

冇負擔

另一個關鍵——以我分析,是他多年來只管做自己的份內事。

馬仔帶點激動地說:「我唔會為咗達到一個目的或理想,而去做啲所謂不擇手段嘅事!我咁早出嚟社會做嘢,十七歲入朗文做sales賣教科書,十九歲入田氏化工,廿一歲時,一年已經幫公司賺二千幾萬生意,我點會唔知商場嘅黑暗?你要我奸,我唔係唔識呀,你估我係一個天真爛漫嘅十六歲小男孩咩?我唔做啲枱底嘢,係因為我做唔落咋!呢個係我幾自豪嘅事!

「我就嚟四十歲,我唔想咁大個人先去做一啲第日會內疚、覺得對人唔住嘅事,我夠膽講,我冇對過任何人唔住,我個頭幾時都可以抬得咁高,有冇人需要我低下頭、覺得驚呢?sorry,到依家都冇!但有冇人見到我,會覺得對我唔住呢?我諗會有囉!所以我到今日對住任何人,我都冇負擔o架!我覺得我依家咁樣舒服咪得囉!」

在演藝圈打滾這麼久,應該也可以找傳媒朋友幫手宣傳宣傳,增加個人知名度吧!「我到依家每次出到去啲大型記者會,我都會周身唔聚財!除非去到撞到啲啱傾又熟嘅朋友,如果唔係,我又係自己戇居居!啲傳媒朋友,成日都叫我唔好咁悶棍,但我本身個人就係咁,好驚講咗啲嘢會得罪人,所以變得好悶。我又唔識埋堆、唔識social,我承認係幾食古不化!」

少年時的馬仔,家住深水埗白田邨,共有三個姐姐和一個妹妹。

才五歲的馬仔跟父親合照。

樽頸位

只是,始終是身在娛樂圈呀,難道不想當上視帝嗎?「獎項,冇人唔想要!你話無綫畀個獎我獎勵我,我絕對開心到飛起啦!但經過好多次冇獎攞之後,我自己都變得冇乜感覺,好聽啲咪平常心囉!要攞一個獎,太多元素喺裏面。我曾經同自己講過,一日做唔到視帝,我都唔會離開無綫,好彩我淨係自己同自己講啫,如果唔係,我分分鐘一世喺無綫!哈哈哈!

「不過就算我冇獎攞,我都係咁做o架啦!我唔係冇野心o架!但我覺得依家呢個生存方式,令我最舒服,我唔覺得咁樣係達唔到我想要嘅目標囉!下年我喺TVB又約滿,最理想係可以繼續為公司效勞,同時又可以拍內地劇,因為依家內地劇啲水平好高,我亦都一路睇緊好多劇本!我好想喺演戲方面有啲轉變同突破,最好係可以演到我未演過嘅大反派同埋民初劇。演大反派好好玩o架!如果個角色天生就係咁壞,天生就係殺人狂,你奈我咩嘢何?民初呢,因為我好鍾意呢段歷史,畀我演吓孫中山,或者係《京華春夢》裏面嘅鎮西呢啲角色,真係唔錯o架!如果呢兩種角色我都駕馭到,仲有咩嘢角色可以限制到我?當然,呢啲角色,我都要等一個好好嘅劇本先去發揮啦!我已經ready晒,我真係好需要呢啲刺激!」

一個形象正氣如此的演員,做大反派,相信出來的效果應該幾心寒!

母親九九年因病過身,令馬仔打擊很大,患了大半年抑鬱。

未夠一歲的馬仔全裸照,很性感呢。

四十而不惑

今年十月廿六日,馬浚偉便正式踏入四十歲了。

四十而不惑,馬仔說,活到這個年紀,他覺得現時的身心狀態,是最fit、最穩定。

「我一啲都唔介意畀人知我幾多歲,我屬豬,就嚟四十,咁又點呢?無綫我哋嗰個年代嘅小生,個個都過四十歲o架啦,反而我覺得依家嘅自己,係最成熟同最穩定!諗嘢、思想方面,我都好清晰!而且,我覺得呢個年紀,先係男演員最黃金嘅時候,做乜嘢角色都可以拿揑得好好!

「我由入行到依家,所有我嘅底細都一直交代得好清楚,冇嘢隱瞞,所以令到我自己都會confident咗,就算你幾時問我,我嘅答案都係一樣,我入行都十八年,仲有咩嘢history唔見得光呢?要踢爆,一早都畀人踢咗啦!人點都要承認自己嘅過去,承認唔到,將來就會好辛苦!」

最弊,唔係個個藝人嘅過去或底細,都可以咁坦蕩蕩show晒出嚟呢。

2014年周漢明生肖運程預測
林炳南馬年生肖大預測麥玲玲2014年生肖大預測李丞責2014年生肖大預測
全城最強 猛鬼放題
《蜘蛛俠2:決戰電魔》優先場戲票60張《吸血學院》換票證60張《吸血學院》海報20張《黃金海岸 遊艇展2014》VIP入場券50張