*

為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
文章 | 圖片 :
主頁 > 時事 > 政官莊 > 封維景變「籠裏雞」 性工作者被困七日內情
封維景變「籠裏雞」 性工作者被困七日內情

封鎖灣仔維景酒店一仗,政府算係打得漂亮,老外「放監」後人人都話happy,香港贏晒國際形象。究竟呢七日裏面有乜未為人知嘅事?由於外國住客星散,已冇人會講,不過有內幕人士向本刊記者爆咗單有趣漏網內情,值得向大家報吓。

呢位人士話,政府封鎖酒店當晚,咁啱有位老外住客心思思想一嘗香港「美食」,call「外賣」叫咗一名本地應召女郎上酒店房,此類服務一般個幾鐘就完事,收咗錢便可鬆人,但蹺就蹺在呢位姐姐仔正想離開之時,政府人員突然殺到拉閘封舖,佢亦被當住客,成了「籠裏雞」,焗住留在酒店內。

酒店解封後大批住客歡呼湧出,原來人群中有一名「身份特殊」唔見得光的女子。

搵房落腳 四出搵食

問題就嚟啦,姐姐仔唔係住客,無房間可住,成了吊吊fing嘅無主孤魂。叫「外賣」嗰位老外都算好人,曾為姐姐仔搵棲身之所,要求酒店提供多一間房,但酒店方面話有困難,因為一批員工被困返唔到屋企,要佔用部分客房,所以唔可以再加開房間畀人客。結果,姐姐仔惟有入住老外間房,究竟佢有冇收足個客人七日錢,就天曉得! 另有一個說法,話酒店內有好多單身老外住客,被困多日百無聊賴,苦悶到暈,對某類服務大有需求,所以姐姐仔嗰幾日應接不暇,生意未停過,大家各有所得,各取所需,齊齊開心。住客「放監」時表現咁高興,除咗一直享受美酒佳餚,好似開party咁,仲因為有另類「消遣」,真箇快活過神仙。

解封當日,有傳媒也收到風,知道有姐姐仔被困在酒店內,故吩咐記者在大門口金睛火眼盯住,希望搵到呢位傳奇女子,問吓呢段傳奇經歷,但最後畀佢巧妙遁走。

除了「老外與姐姐仔」的故事,一位官場老友又提供另一疑似事件。話說封鎖酒店當日下午,一位香港男士入咗酒店,在某個房間逗留咗粒幾鐘,然後離開,佢後來聽到政府在酒店內搵到首宗確診案例,為怕傳染家人朋友,主動向政府「自首」,最後與住客一併被隔離。究竟呢位先生入去做乜?是否接受某種服務?佢冇講,有關人員當然亦唔會問,各位讀者自己想像吓啦。

官場老友仲話,解封當晚,大多數人未等到大門打開,已急不及待除晒口罩,深深一吸自由空氣,但個別人士仍然戴住口罩冇除,似乎唔想暴露其面貌,如果記者醒目,應該鎖定佢哋(特別係年輕女性)為跟蹤目標,好可能有重大發現,可惜記者冇咁做。

龔耀輝偷食 太太一怒分居

靚女主播林燕玲訪問龔耀輝後「辣着」。原來呢位仁兄本性多情,呢類情緣,已有N段。

立法會選舉會計界候選人龔耀輝,背住老婆同now財經台女主播林燕玲偷情,被狗仔隊影晒相,當場斷正,成為政圈近日最八話題之一。與輝哥稔熟嘅人士向本刊透露,雜誌記者當日突擊訪問龔太,佢表現出同輝哥仍好恩愛,似乎關係幾好,原來實情並非如此,在爆出此事之前,佢兩公婆關係其實已好差,可謂同牀異夢,貌合神離,已瀕臨破裂。老公偷食女主播事件曝光後,兩人即時分居,睇嚟散梗。

呢位人士說,輝哥本性喜歡結識異性,自覺是財經才子,寫得睇得又talk得,故以溝女為樂,也的確吸引到靚女投懷送抱。佢同「小飛俠」(林燕玲花名)墮入愛河之前,已曾與其他靚女拍過散拖,而佢亦不斷轉換目標,屢屢得手,龔太看在眼裏,只能無奈暗自神傷,所以對今次緋聞,龔太應該唔會好驚訝。

偷情故事出街後,輝哥暫時銷聲匿迹,政圈友人多數認為呢單嘢對佢日後參選好不利,唔明白點解佢咁傻,明知緋聞會損害佢從政,仍然玩得咁揚。一位洞悉人性嘅朋友就話,風流乃某啲人嘅本能,好多時間連自己都控制唔到,中外好多政治人物都「死」於婚外情,原因就係咁。

至於「小飛俠」,聞說now新聞台管理層對呢單嘢好唔likey,覺得影響主播形象,以後呢位靚女能否再出鏡,班大佬仍在考慮中,講唔定最後要退居幕後。愛情係盲目嘅,「小飛俠」亦唔例外。

出招初見成效 最新失業率只微升

財爺早前連環出招,已初見成效,將公布的最新失業率,只微升零點一個百分點。

財爺決定下月泵水百億刺激經濟,然銀碼唔算大,點都有啲作用,據官場老友講,由舊年年尾到今年五月,政府嘅一系列紓困措施已初見成效,即將公布嘅最新失業率,只係百分之五點三,比上次僅微升零點一個百分點,即係話失業人數冇多到。

佢話,企業冇大量炒人,同政府嘅措施有啲關係。自從政府放寬中小企貸款後,已批出九千幾宗,六千五百間企業收到錢,金額總共一百七十億。呢批企業僱用十幾萬人,借到錢就可暫時撐住,唔使郁手裁員,起碼可以保住大部分職位。此外,政府用多咗錢搞中小型工程,亦對遏止失業率有小小幫助。

財爺一直最擔心失業率,原本以為新一季會彈升到百分之六,甚至百分之七,好彩出嚟嘅數字冇咁高,只要企業繼續頂得住,盡量減薪而唔炒人,加上政府六月再加碼,相信失業率唔會大幅飆升。

政府預測今年全年經濟最多收縮百分之六點五,好似幾得人驚,但比起對手新加坡,已算唔錯。今年首季星洲GDP收縮百分之十一點五,預計全年收縮百分之九,乃六五年獨立以來最差的一年。星洲過去太倚重於出口,又唔似香港有大陸「傍」住,所以跌落嚟比香港慘好多。

分類︰ 政官莊
2014年o靚模寫真大晒冷
全城最強 猛鬼放題
星級口才訓練班 10名學額《猿人爭霸戰:猩凶崛起》海報20張《分手100次》換票證60張《戰神:海格力斯》換票證60張位元堂養生軟果 - 柑桔28粒裝禮盒兩盒